15:42 Զիդան. Բեյլն անհավանական ֆուտբոլիստ է | |
«Ռեալի» գլխավոր մարզիչ Կարլո Անչելոտիի օգնական Զինեդին Զիդանը վերջերս այցելել է Աբու-Դաբի, որտեղ մի քանի ԶԼՄ ներկայացուցիչների հետ համատեղ հանդիպում է ունեցել: Լեգենդար ֆրանսիացու հարցազրույցը թարգմանաբար ներկայացնում ենք ձեր ուշադրությանը:
-Ինչպե՞ս է Գարեթ Բեյլի ինքնազգացողությունը: -Նա լավ ինտեգրվեց, բոլորը նրան լավ ընդունեցին: Բեյլին ֆիզիկական պատրաստվածությունն էր պակասում, նա քիչ էր մարզվում, բայց ուժն ու եռանդը չես խլի: Հիմա նա մարզվում է ու շուտով պատրաստ կլինի: -Նրա գինը համապատասխանո՞ւմ էր մակարդակին: -Շուկան այսպիսին է. կա ակումբ, որն ուզում է գնել, մյուսը` վաճառել: Այնքան գումար է փոխանակվում, որքան որ արժե ֆուտբոլիստը: Բեյլն անհավանական ֆուտբոլիստ է, դրա համար էլ գնեցինք: -Կրիշտիանու, թե՞ Ռիբերի. ո՞ւմ կտայիք «Ոսկե գնդակը»: -Երկուսն էլ արժանի են պարգևի, բայց ինքս Ռիբերիին կտայի մրցանակը, քանի որ նա «Բավարիայի» հիմնական ֆուտբոլիստն է եղել, մեծ ներդրում է ունեցել թիմի հաղթանակներում և երեք տիտղոս է նվաճել: Բայց կա մեկ այլ խնդիր՝ Լեո Մեսսին: -Ձեր կարծիքով ինչո՞ւ Բենզեման գոլ չի խփում: -Երբ ֆուտբոլիստի մոտ սև գիծ կա, նա կարող է կորցնել վստահությունը, բայց տաղանդը` երբեք: Հիմա նրանից գոլ են պահանջում, չեն ստանում ու քննադատում են: Բայց չի կարելի կասկածի տակ դնել Բենզեմային ու նրա աշխատանքը «Ռեալում»: Նա երբեք չի հանձնվում: -Մորատան պատրա՞ստ է Բենզեմայի հետ պայքարել մեկնարկային կազմի համար: -Լավ է, երբ թիմում երիտասարդ ու աճող ֆուտբոլիստներ կան: Բենզեման հիմա վատ ժամանակներ է ապրում, բայց նա այն ֆուտբոլիստն է, ով շատ է աշխատում դաշտում: Նա դեռ կվերադառնա... -Ապագայում գլխավոր մարզիչ դառնալու միտք ունե՞ք: -Ես երազում եմ մարզել Ֆրանսիայի հավաքականը: -Ինչո՞ւմն է կայանում «Ռեալի» մարզչական շտաբի խնդիրը: -Ես երկու օգնականներից մեկն եմ: Կլեմենտը զբաղվում է ֆիզիկական պատրաստվածությամբ, ես` ավելի շատ ուսումնասիրում եմ թիմը, աշխատում ֆուտբոլիստների հետ: Անչելոտիի հետ միասին ենք աշխատում, բայց յուրաքանչյուրն իր դերն ունի: -Ինչպիսի՞ն է ձեզ համար Անչելոտիի հետ աշխատանքը: -Շատ մարզիչների հետ եմ աշխատել ու կարծում եմ, որ ինքս բոլոր հատկանիշներն ունեմ մարզիչ դառնալու համար: Կարլոյի հետ երիտասարդ տարիներիս էլ եմ աշխատել, նա հիմա ավելի փորձառու է: Նա ֆանտաստիկ մարզիչ է: -Ինչպե՞ս կգնահատեք մրցաշրջանում «Ռեալի» թույլ մեկնարկը: -Արդյունքները ձեր առաջ են: -Ի՞նչ եք մտածում այն մասին, որ Իսկոյին ձեզ հետ են համեմատում: -Ինձ էլ են համեմատել, երբ նոր էի սկսել խաղալ: Մարդիկ ինձ Պլատինիի հետ համեմատել են մեր դիրքի համար ու այն բանի, որ «Յուվենտուսում» եմ խաղացել: -Ո՞վ է թիմում լավագույն ընկերը: -Ռոնալդոն: Նա անհավատալի տաղանդավոր էր, միակն իր կերպարում: | |
|
Մեկնաբանություններն ընդամենը՝: 0 | |