ՈւԵՖԱ-ն ընտրել է Չեմպիոնների լիգայի ընթացիկ խաղարկության խմբային փուլի լավագույն թիմին, ֆուտբոլիստին, գոլը:

Լավագույն թիմ է ճանաչվել Մադրիդի «Ատլետիկոն»: Կարծես չէր եղել այն երեքամյա դադարը, երբ «Ատլետիկոն» չէր խաղում Չեմպիոնների լիգայում: Խմբային փուլում մադրիդցիները ոչ մի պարտություն չկրեցին և ընդամենը մեկ դեպքում ոչ-ոքի խաղացին «Զենիթի» հետ, երբ արդեն ապահովել էին փլեյ-օֆֆ փուլի ուղեգիրը: Դիեգո Սիմեոնեի թիմը խմբում զբաղեցրեց առաջին հորիզոնականը' երկրորդ տեղում գտնվող «Զենիթի» նկատմամբ ունենալով 10 միավորի առավելություն: 

Լավագույն ֆուտբոլիստ անվանակարգում հաղթող է ճանաչվել Մադրիդի «Ռեալի» առաջատար Կրիշտիանու Ռոնալդուն: Պորտուգալացին այս խմբային փուլում, մասնակցելով 5 խաղի, խփեց 9 գոլ: Նման հաջողության մրցաշարի ամբողջ պատմության ընթացքում դեռ ոչ մի ֆուտբոլիստ չի հասել: Հիշեցնենք, որ Ռոնալդուն նախորդ մրցաշրջանում, խփած 12 գոլով, ճանաչվեց Չեմպիոնների լիգայի լավագույն ռմբարկու:

Խմբային փուլի լավագույն գոլի հեղինակը Զլատան Իբրահիմովիչն է: «Անդերլեխտի» դեմ խաղում «Պարի Սեն Ժերմենը» հաղթեց 5:0 հաշվով, իսկ շվեդ հարձակվողի' այդ խաղում խփած երրորդ գոլը ճանաչվել է խմբային փուլում լավագույնը: